迷你奶皇月餅

 

踏入8月，係時候做定月餅同家人、至愛過節嘞！足料又有奶黃香味的酒店奶黃月餅，有炒價又未必買得到，抵唔抵食見仁見智，不過你有冇諗過自己動手做呢？其實方法好簡單，加上自己做，不單止可用奶黃餡，仲可以在烘焙店搵到香芋、芝麻不同餡料，做法一樣，自已落足心機做，遠遠好食過外面買啦！

材料：

（8個迷你月餅份量） 

1 奶黃餡　180g

2 鹹蛋黃　4個

3 玫瑰露酒　小量

4 牛油　50g

5 糖霜　30g 

6 蛋　12g

7 雲尼拿油　小量

8 低筋麵粉　72g

9 奶粉　12g

10 吉士粉　8g

11 高筋麵粉　小量 

做法：

1 把鹹蛋黃放入焗爐，以150度焗5分鐘，取出切半，灑上玫瑰露酒，一直浸住，備用。

2 把冰凍牛油放於室溫，直至變軟身，加入糖霜、蛋、雲尼拿油，拌勻。

3 低筋麵粉過篩，連同奶粉、吉士粉一齊加入(2)，搓成粉糰，再分成8份，搓圓，備用，每份大約重20g。

4 把現成奶黃餡分成8份，搓圓，備用，每份大約重22g。

5 把鹹蛋黃壓入奶黃餡，然後把奶黃餡完全密封住鹹蛋黃。

6 把(3)粉糰壓扁成圓形，再包住(5)奶黃餡，記住厚度要平均。

7 在月餅模灑上高筋麵粉，作用是令月餅不黏底，按壓模具成形，最後在焗盤上推出月餅。

8 以220度焗15分鐘，金黃程度因個別爐溫而異，焗多2-3分鐘，直至金黃色才收火都可以。

9 餅底有油份，放涼後，放入盒前，記住舖上牛油紙或蛋糕紙，送俾人就美觀得多啦！

my tips:
* 天時熱，步驟(3)的牛油粉糰要快手搓起，否則手溫會令粉糰變油，影響之後的模具造形，所以我會開冷氣做。
*搓起粉糰及將餡料分份量時，最好放在乾淨的不黏布上，因為材料都好黏，容易黐塵。