北海道牛奶包（麵包機版）

平時返工早上我食早餐多數是麵包加杯港式奶茶，味道夾到不得了，利用麵包機焗北海道牛奶包，一次九個出爐，仲可以食足三日！貴少少買北海道牛奶，更加香噴噴，用麵包機發酵完的麵糰，仲可以做出不同做型，保證零失敗！

蕃茄三文魚雞肉煲仔飯

早前成日被焗蕃茄飯洗版，一直未有機會試做，今晚趁天氣凍凍哋，老總又不在家，自己焗了一人煲仔飯，還用了含大量omega 3同高蛋白質有機雞肉，再加雞湯，少鹽、冇油，食得好健康，而且好易煮，真係快靚正到極！

蜜汁豬肉乾

豬肉乾同曲奇餅一樣咁邪惡，又好食又易肥，不過自己整點都健康過買的，不加味精又可以控制糖份，今次試整參考了谷友食譜，不過爐溫我自己再調較過，完全冇難度，間中整來過吓口隱啦！

練奶包（麵包機版）

早前一連買了幾個LC煲，當然要物盡其用，見有人用花形煲剛好可以焗六個餐包，脹卜卜好得意，我改動一下，用來焗練奶包，效果好理想，當然用不同形狀的焗盤都絕對可以焗出相同的鬆軟度。我用麵包機發酵麵糰，簡單方便，需要的材料又便宜，仲好味到一家大細唔夠分！

乾蒸豬肉燒賣、牛肉燒賣

我是燒賣粉絲，老總是牛肉粉絲，所以這個點心簡直是絕配，好多朋友問：複雜嗎？其實製作不難，今次甚至偷懶，用現成燒賣皮和蝦膠，燒賣皮是在F字頭超市買的，把兩個最複雜的步驟删除了，輕輕鬆鬆就可以包好精美的點心啦！

紅酒燴牛腩

中醫話女人補血最簡單可以食牛肉，對我這牛魔王兩公婆來講啱晒！屋企長期有齊牛肋條洋蔥甘荀青紅椒，只要買一小支紅酒，就可以炆出一煲紅酒燴牛腩，今次用紅酒可以帶出牛肉味之餘，味道不會太搶，加上紅酒內的葡萄多酚有抗氧化作用，經蒸煮後成分依然存在，所以這個餸都算是補品嚟㗎！

泰式咖哩牛腩

曾經在蘇梅學整咖喱醬，利用十幾二十種天然材料，放在石杵搗成，味道當然夠晒香，不過過程太複雜對手又攰，早幾個月經谷友介紹，試煮了泰國著名餐廳─Blue Elephant藍象自家出品的咖哩醬，一試全家都大讚，青、紅、黃咖哩各有不同辣度，以青咖哩的辣度最輕，我自己就比較鍾意黃咖哩配牛腩，藍象咖哩在泰式雜貨鋪有售，有佢所有程序都變得好簡單。

蜜汁烤春雞

一直都好想整香草焗春雞，但是老總不喜歡香草的味道，於是利用家中用剩的醬料，自創蜜汁＋BBQ醬＋醬油烤焗法，原本擔心味道會怪怪的，但意料之外的香口入味，成功！我買的是法國黃春雞，肉質好嫩，配上荷蘭有枝蕃茄、薯仔及黃椒，就成為豐富的菜式嘞！

海參花膠薑蔥雞煲

放大假，佔中，原本想好好地煮些新菜式，但是搭車不便，令我只能到超市買餸，於是買了美國走地雞，把家中的海參花膠解凍，炆出大大煲雞煲食足兩日，雖然走地雞價錢不便宜，但是肉質的確比籠養雞厚肉和鮮味，至於是否真的打少些針則見仁見智，只要醃30分鐘，都拍得只新鮮雞的味道。

日式咖喱焗肉排

 

我怕辣，但又成日身痕想食辣，如果黃綠咖喱，極其量我只可以食藍象，但是日式咖喱又覺得無厘文味，好難搞！今日放假變身師奶去超市買餸，心思思又想整咖喱之際，見一款咖喱磚貨架被人掃得七七八八，即刻買來炆肉排試下，還以為這類七五九貨色一般般，但竟然散發濃濃而又不太辣的咖喱味，正！其實我都是用家常便飯的炆法，除了肉排薯仔，還可以加入不同雜菜，送白飯好開胃。

脆皮燒肉

 

第一次自製燒肉，事前研究了好幾個食譜，有的說要把五花腩吊乾，有的說放入雪櫃醃過夜，考慮到香港天氣潮濕，所以決定好似整叉燒一樣，放入雪櫃把豬皮抽乾水份。雖然今次燒肉皮爆得不夠細密，但是味道簡直同街賣的沒有分別，老總話有90分！到你做的時候，記住在豬皮刺多些孔，上百個更加好，咁就一定爆到又靚又香的燒肉皮喇。

焗豬扒飯

 

細細個就在大家樂食一哥焗豬扒飯，相信大家都有食過吧？有沒有留意豬扒有時會焗得過乾和實，飯底有時則會過濕，其實自己在家做都好簡單，好少成本就可以焗出足夠3-4人食，炒飯底更加可以隨意加入粟米粒、磨菇、青豆不同材料，又香又豐富，邊個話港式食物唔好味呀？

檸檬蛋白批 Meringue Lemon Pie

 

要做到傳統法式甜品那種神髓，真的要磨練好長時間，好似這款Meringue Lemon Pie，我覺得絕對是易學難精，不過我的味道，家人就話拍得住餅店，檸檬吉士的酸味剛剛好，餅底不乾不黏，難度在於要把餅底盡量做得薄，口感才會脆。大熱天時，凍食一流，不太喜歡甜的人都話佢正！

花膠響螺淮山玉竹雞湯

花膠我最常用來煲湯，用花膠筒最好，因為質地較軟和黏，容易溶化於湯之中，令湯更原汁原味。致於雞，買冰鮮雞就可以了，通常食譜教用半隻雞，不過我會去頭去翼去雞脾，餘下的用來煲湯，雞翼、雞脾則用瑞士汁炆，變多一個餸，好簡單！

花膠炆海參

結婚時我媽咪送我一大袋花膠，雖然是花膠筒而不是扎膠那類名貴品種，但是給我日常煲湯煮餸就非常適合，來來來，忙完一星期，等我炆下花膠海參補番下！花膠滋陰養顏所有女士都不會抗拒，靚的花膠含豐富膠原蛋白、維他命、鈣質和磷質等，同海參一齊炆，有口感又美味，仲係最快補充膠質的方法添！

三色椒炒牛柳

 

家常便飯之中，我經常煮的菜式有三色椒炒牛柳，青、紅、黃椒各買一個，可以分開2-3次食，牛柳我會在supermarket買一pack裝的牛陰柳，這種肉質即使炒得過熟，都依然鬆化有肉味，所以好易煮。三種椒含有的維他命A和C都好高，還有鈣質、鐵質、維他命P、B1、B6等等，有降低血壓、抗氧化、防癌等等多種營養價值，所以好啱一家大細食。

蒜蓉粉絲蒸扇貝

只要海鮮夠新鮮肥美，其實比肉類易煮好多，剛過去的中秋，我就晨早到街市買了五隻大扇貝，用粉絲蒜蓉蒸，鮮味又惹味，食到老總黏黏脷，其實扇貝含有豐富的蛋白質、鈣質、磷，又有滋陰補腎的功效，營養價值好高。另外，因為鑄鐵鍋本身已有鎖水功能，所以這次我沒有把粉絲放在扇貝的上面，如果你用中式鑊蒸，不妨放少許粉絲在扇貝上面，可以防止扇貝水份被抽乾的！

日式芝士蛋糕

今年中秋選擇了做日式芝蛋糕，代替去年的奶黃月餅，其實日式芝士蛋糕話易唔易，當中一些技巧一定要做足，不然就會好似macaroon一樣，裂開、過濕，還有皺皮，我見好多食譜都教以150度蒸焗，但是我卻用180度焗足30分鐘，定了蛋糕雛形後，再加爐溫至200度，目的是給蛋糕「上色」，表面就會出現微燶的金黃色，質感不單止軟綿綿，還漲卜卜，當然亦都香勻全間屋啦。至於如何減低蛋糕出現皺皮情況，咁就要留意我的tips嘞！

梅子焗肉排

今個夏天熱到幾乎唔識肚餓，加上放工要把握一小時快煮，我會推介梅子焗肉排，酸味味夠晒開胃，又可送飯，有一次我更為此餸連食兩碗白飯，搞到第二日要禁食澱粉質囉！

冬菇豬肉蝦肉燒賣

  

燒賣是我同家人最最最鍾意食的點心，自己整點心花心機又考工夫，不過可以自由調較豬肉肥瘦同配料，所以花少少時間絕對值得。我覺得不需要為此準備蒸籠咁大陣仗，只要放在玻焗盤上蒸就不會黐底，想慳時間，可以買現成燒賣皮，而我則是自己搓，所需材料亦好簡單，記住不要蒸超過5分鐘，否則餡料就會變硬嘞！

魚香茄子煲

魚香茄子煲是到大排檔食飯的必選菜式，火爐鐵鑊有鑊氣又有風味，不過自己煮落少油就健康得多，茄子含有豐富的維他命E和維他命P，有抗衰老、預防血管病的好處理，加埋咸味適中的馬友一齊炒，保證你家人都話好味呀！

匈牙利燴牛肉

煮匈牙利燴牛肉，一定要用上匈牙利紅椒粉Paprika才夠原汁原味，就是因為這種惹味的調味料，令人總是分不清楚廚師除了牛，還用了甚麼材料，因為所有蔬菜連牛肉，都被紅椒粉濃濃的顏色蓋過，雖然這種紅椒粉聞起上來似足辛辣麵的味道，但是食起來一點都不辣，仲會即時令湯汁變杰身，個人認為比紅酒燴牛肉更香，拌飯食一流。

英式鬆餅

細細個就見媽咪經常買鬆餅食，她說最傅統最「啃頸」那種石頭鬆餅先好食，我相反，鍾意鬆化和輕微軟身的，的確，做法有好多種，有人加奶或芝士，我覺得以下簡單材料，就足夠做出香噴噴又鬆化的鬆餅，記住一出爐就趁熱食喇！

法式焦糖燉蛋 Creme Brûlée

好食的Creme Brûlée除了要有蛋香之外，仲要火喉適中，燉蛋先至口感嫩滑，同香脆的焦糖形成對比，太大火或焗得太耐，燉蛋都會變諧同影響香味。另外，容器的大小都好緊要，太深的話，中間部份會難以焗透，所以好多Creme Brûlée焗杯都是3"x1.5" 或3.5"x2"，這個size焗出來就最嫩滑嘞。

百變Macaroon

掌握到macaroon的做法之後，仲可以加入創意，做出好多變化，好似心形、雲石色、畫公仔，又或是加入餡料，這個像不像Laduree的款式呢？我建議大家亦都可以用來做蛋糕裝飾，收到的女士一定開心到暈呀！

French Macaroon

我同好多女人一樣，對甜品又愛又恨，精美的賣相固然是最大吸引力，但又怕食落肚變成脂肪。不過我一樣照整，家人、朋友當然經常幫我清場啦！其中自己最滿意的是macaroon，法式小圓餅本來平平無奇，但是配上獨有的裙邊及繽紛色彩後，即時優雅起來。冇錯，裙邊最考工夫，做之前，記住要同你的焗爐打好關係，（摸清溫度），試多幾次，好快便會摸到竅門。

百花釀海參

間中我會煮得好少少慰勞一下自己，其中一樣我鍾意的菜式有扣海參，不過自己浸發海參需要大量時間同工夫，所以我通常用已浸發的墨西哥海參，除了有口感，又含有豐富的氨基酸、膠原蛋白、鈣同硒等等養份，營養價值好高，可以養血、防癌、補腎、降血脂，仲有美容，好處多多，齋食冇乜味，釀入又鮮味又彈牙的蝦膠，就正到痺喇！

鮑魚響螺花膠沙參玉竹豬展湯

老總工作成日捱夜，所以我每星期都會煲老婆靚湯俾佢補一補，鮑魚、花膠、響螺都有滋陰補腎的功效，沙參、玉竹、麥冬可潤燥安神，我覺得好適合捱完夜飲，同樣材料，冬天可用來燉湯，夏天用鑄鐵鍋煲2小時就出晒味㗎喇！

蜜汁叉燒

我的老爺奶奶特別鍾意食叉燒，不過在燒味鋪買的叉燒往往都燒得太乾或者太瘦，冇口感又冇醬汁味，所以我就向谷友取經，再自己鑽研出最佳的烤焗時間，只要準備2.5-3cm厚度的梅頭肉，跟住以下步驟，就可以食到半肥瘦的肉香，矜貴啲，買黑豚肉來燒，肉質仲鬆化嫩滑！

迷你奶皇月餅

 

踏入8月，係時候做定月餅同家人、至愛過節嘞！足料又有奶黃香味的酒店奶黃月餅，有炒價又未必買得到，抵唔抵食見仁見智，不過你有冇諗過自己動手做呢？其實方法好簡單，加上自己做，不單止可用奶黃餡，仲可以在烘焙店搵到香芋、芝麻不同餡料，做法一樣，自已落足心機做，遠遠好食過外面買啦！

周打海鮮湯

出街食飯成日遇到味道差又不足料的情況，如果服務質素合格已算是bonus，所以我索性自已煮，外面的周打蜆湯好多都冇乜海鮮味，或者只是杰撻撻的冇味cream，今次我落足料，集幾家之大成，加埋草蝦，湯底除了有海鮮味，仲好有口感，食量少的話，一碗湯已經食得飽飽！

鴨仔 BIRTHDAY CUPCAKE

 

 

香港不及美國流行食cupcake，特別是女士，見到忌廉都怕怕，不過cupcake可以玩出千變萬化的造型，所以近年好多人在婚禮或特別event都會訂造靚靚cupcake送俾客人，我自己都收過不少美容品牌送上的cupcake，立體花、動物、花紋乜都有，但講到手工，我當然最欣賞自己的作品啦！今次的鴨仔cupcake，是為慶祝侄仔boy boy五歲生日時做的。

混醬烤豬肋排

我個人覺得烤焗比蒸煮更易控制，又幾乎不需要睇火，最啱懶人，之前想煮出有睇頭的菜 式，於是嘗試烤焗脂肪比較少的豬肋排，仲將BBQ醬混叉燒醬一齊醃，一試自己都俾個like！做法仲好簡單，只要到supermarket買樽BBQ醬、 叉燒醬同一條急凍豬肋排，再準備定夕膠掃就搞掂，weekend買定看門口最啱！

沖繩黑糖豬軟骨

早前同老總去沖繩旅行，在當地買了大量黑糖，大粒、沙粒、加工、薑味買齊晒，因為黑 糖含有豐富的鈣和鐵，以及維他命B1和B2，低甜，又可驅寒，是好有益的食材，我除了鍾意用來煲桑寄生蛋茶，仲經常用來炆肉，代替冰糖，每次炆豬軟骨家人 都會掃清光，材料、步驟都極簡單，你哋都試下啦！

沙樂美腸粟米雙椒 PIZZA（麵包機版）

 Family gathering或者一大班朋友到訪，我最鍾意整大大個pizza招呼，因為材料可以自由組合，仲可以同家人朋友一齊落手砌靚佢，發揮創意。開blog 日子剛巧做了個pizza，自己都不知算甚麼風情批，索性因應材料叫它作沙樂美腸雙椒Pizza。因為當日有幾個餸要煮，所以偷懶用了麵包機發酵麵團，提 提大家如果冇大焗爐，可把麵團分成數個小麵團，製作小Pizza，一樣咁好食！